Дзень рэдэмптарысцкіх пакліканняў 2025: «Наша місія – пакінутыя»
У нядзелю, 9 лістапада 2025 года, Рэдэмптарысцкая Сям’я па ўсім свеце будзе адзначаць Дзень рэдэмптарысцкіх пакліканняў, прысвечаны тэме: «Наша місія: Пакінутыя». У год, адзначаны Юбілеем 300-годдзя з дня нараджэння святога Герарда Маелы і Годам Місіі, гэта запрашэнне адкрыць нанова апостальскі запал і пастырскую крэатыўнасць, якія натхняюць рэдэмптарысцкі харызмат, несучы надзею Евангелля ў новыя перыферыі свету.
Дзень рэдэмптарысцкіх пакліканняў 2025
«Наша місія: Пакінутыя»
Дарагія субраты і свецкія партнёры ў нашай Місіі!
У нядзелю, 9 лістапада 2025 года, уся Кангрэгацыя будзе адзначаць штогадовы дзень папулярызацыі рэдэмптарысцкіх пакліканняў, пад тэмай:
«Наша місія: Пакінутыя».
Сёлета, у рамках Года, прысвечанага Місіі, і Юбілею, які адзначае 300-годдзе з дня нараджэння святога Герарда Маелы, мы запрошаны зноў распаліць місіянерскі запал, які характарызуе наш харызмат, і аднавіць сваю прыхільнасць абвяшчаць Шчодрае Адкупленне з надзеяй і творчай вернасцю.
Натхнёныя Communicanda 2/2025, «Пераплывём на той бок» (Мк 4, 35), мы слухаем голас Адкупіцеля, які кліча нас пераправіцца да новых гарызонтаў місіі: геаграфічных, культурных, сацыяльных, лічбавых і экалагічных перыферый, дзе чалавецтва чакае на слова суцяшэння і надзеі.
Постар гэтага Дня адлюстроўвае гарызонт мора — сімвал нашага місіянерскага падарожжа — і твары субратоў-рэдэмптарыстаў, якія прадстаўляюць усю нашу Сям’ю ў місіі.
Яны нагадваюць нам, што на іншым беразе чакаюць пакінутыя: канкрэтныя мужчыны і жанчыны, да якіх мы пасланыя. Мы пакліканы ісці за Хрыстом Адкупіцелем, абвяшчаючы Ягонае Евангелле з апостальскім запалам, пастырскай крэатыўнасцю і духам місіянерскага навяртання. Дух Святы заклікае нас выйсці за межы звыклага, служыць з радасцю і сведчыць — разам са свецкімі, якія падзяляюць нашае пакліканне, — пра збаўчую прысутнасць Адкупіцеля ў сэрцы свету.
Як і ў папярэднія гады, будзе праведзены збор сродкаў для Фонду салідарнасці рэдэмптарыстаў для падтрымкі пачатковай фармацыі ў Афрыцы і на Мадагаскары, у Лацінскай Амерыцы і Карыбскім басейне, Еўропе і Азіі, а таксама пастырскіх праектаў і надзвычайнай дапамогі. Няхай гэтае ахвяраванне стане канкрэтным знакам нашай еднасці, шчодрасці і прыхільнасці да ўсеагульнай місіі Кангрэгацыі.
Давайце памятаць, што наш гарызонт — пакінутыя. У іх мы распазнаём твары Хрыста і месца, дзе на нас чакае Адкупіцель. Няхай гэты Дзень пакліканняў адновіць у нас запал да евангелізацыі, натхніць новыя пакліканні і падтрымае жывым у ўсёй Рэдэмптарысцкай Сям’і полымя місіянерскай надзеі.
Няхай Марыя, наша Маці Нястомнай Дапамогі, суправаджае нас; і няхай святы Альфонс, святы Герард і ўсе нашы святыя, мучанікі і блаславёныя заступаюцца за нас, каб, з адкрытымі сэрцамі і місіянерскім духам, мы маглі працягваць несці ў свет радасць Евангелля і Шчодрае Адкупленне Хрыста.
Айцец Паўл Вінь, C.Ss.R., Генеральны раднік
Айцец Герарда Эрнандэс Карраскільё, C.Ss.R., Генеральны сакратар па фармацыі
Малітва аб рэдэмптарысцкіх пакліканнях
Ойча міласэрнасці, дзякуем Табе за тое, што паклікаў нас падзяліцца місіяй Твайго Сына, нашага Адкупіцеля. Твой Дух працягвае дзейнічаць у Царкве, абуджаючы ў многіх сэрцах прагненне абвяшчаць Тваю любоў найбольш пакінутым.
Ласкава глянь на моладзь нашага часу: няхай яна пачуе Твой голас сярод шуму свету і адкрые ў Ісусе праўдзівы гарызонт свайго жыцця. Дай ім мужнасці адказаць шчодра, быць гатовымі служыць з радасцю і несці Добрую Навіну Адкуплення тым, хто найбольш у ёй мае патрэбу.
Блаславі, Госпадзе, нашу Рэдэмптарысцкую Сям’ю; няхай яна застаецца вернай свайму місіянерскаму пакліканню і будзе знакам надзеі ўсюды, куды Ты нас пасылаеш. Аб’яднаным у адным Духу, дай нам заўсёды пераходзіць «на іншы бок», дзелячыся Тваёй бязмежнай любоўю з усімі.
Праз Хрыста, Госпада нашага. Амін.
Марыя, Маці Нястомнай Дапамогі, маліся за нас. Святы Альфонс, святы Герард і ўсе святыя рэдэмптарысты, заступайцеся за нас. Амін.
Каментары:
Facebook