Пілігрымка на свята Зыходу Святога Духа па юліянскім календары, арганізаваная грэка-каталіцкай парафіяй Маці Божай Нястомнай Дапамогі, адбылася 17-20 чэрвеня 2016 г. Беларускіх вернікаў чарговы раз гасцінна прыймаў манастыр св. Альфонса ў Львове.
Парафіяльнае свята і адначасова 25-годдзе свайго існавання святкавала ў Нядзелю Тамаша 3 красавіка 2016 г. маладэчанская грэка-каталіцкая парафія Хрыста Чалавекалюбцы. Свята сабрала ў парафіяльнай капліцы вернікаў і гасцей з розных гарадоў Беларусі. Святую Літургію служылі а. Андрэй Крот з Гродна, а. Яўген Усошын, протапрэсвітар Цэнтральнага дэканату БГКЦ, і а. Зміцер Чарнель, рэдэмптарыст. Службу суправаджаў спевам міжпарафіяльны хор з Менску "Прасфара". Сваё блаславенне з нагоды юбілею парафіі для святароў і вернікаў перадаў прэфект Кангрэгацыі ўсходніх цэркваў кардынал Леанарда Сандры.
У суботу, 12 сакавіка 2016 г., у Душпастарскім цэнтры грэка-каталіцкай парафіі Маці Божай Нястомнай Дапамогі ў Менску, адбылася рэкалекцыйная сустрэча для жонак святароў і дыяканаў БГКЦ. Сустрэча пачалася з асабістай малітвы ў цішыні перад іконай Маці Божай Нястомнай Дапамогі, а таксама Акафіста да Маці Божай, які адслужыў айцец Яўген Маліноўскі з Барановічаў.
Кожны год з 18 да 25 студзеня ва ўсім свеце праходзіць Тыдзень малітваў за еднасць хрысціянаў. На гэты час сімвалічна прыпадае ўшанаванне Каталіцкай Царквой блаславёных Падляшскіх мучанікаў, памяць якіх адзначаецца 23 студзеня.
Падляшскія мучанікі гэта 13 сялянаў з уніяцкай парафіі ў в. Пратулін, якія загінулі падчас абароны сваёй царквы ад расійскіх войскаў. Іх ахвяра за вернасць царкоўнай еднасці прамаўляе і сёння да іх нашчадкаў, паказваючы, да якіх трагедый можа прывесці людское свавольства і амбіцыі.
19 снежня 2015 г. перад Вячэрняй скаўты даставілі на парафію Бэтлеемскі агонь.
Па традыцыі ў суботу перад святам св. Змітра (26 кастрычніка) Царква асаблівым чынам моліцца за ўсіх памерлых. Святая Літургія за супакой адбылася на грэка-каталіцкай парафіі Маці Божай Нястомнай Дапамогі ў Менску ў Змітраўскую бацькоўскую суботу 24 кастрычніка 2015 г.
Тэмай чарговай катэхетычнай сустрэчы на грэка-каталіцкай парафіі Маці Божай Нястомнай Дапамогі, якая адбылася 21 кастрычніка 2015 г., была "Старыя невядомыя духоўныя практыкі". Вернікі пазнаёміліся з практыкамі адведвання Святых Тайнаў, духоўнага Прычасця і духоўнага разважання, якія практыкуюцца ў манастырах і духоўных семінарыях, аднак мала вядомыя свецкім людзям.
Прэзентацыя кнігі "Сем камянёў", першага беларускага фэнтэзі, адбылася на грэка-каталіцкай парафіі Маці Божай Нястомнай Дапамогі 18 кастрычніка 2015 г. Аўтар кнігі Аляксей Шэін падзяліўся з вернікамі гісторыяй напісання твору, а таксама яго сэнсам і сімволікай.
Яшчэ адзін беларус, Алег Зубарэвіч з парафіі Маці Божай Нястомнай Дапамогі ў Менску, пачаў духоўную падрыхтоўку для ўступу ў Кангрэгацыю рэдэмптарыстаў. 19 жніўня 2015 г. у Гняздзічаве Львоўскай вобл. (Украіна) ён разам з яшчэ трыма братамі прыняў аблечыны і распачаў год навіцыяту ў Львоўскай правінцыі.
Менская грэка-каталіцкая парафія Маці Божай Нястомнай Дапамогі 28 чэрвеня 2015 г. адсвяткавала парафіяльнае свята. З нагоды ўрачыстасці прыміцыйную Літургію ў гэты дзень адслужыў а. Аляксей Філіпенка, які атрымаў святарскія свячанні 14 чэрвеня 2015 г. Выхадзец з гэтай парафіі, а. Аляксей дзякаваў Госпаду і Божай Маці за дар служэння, для якога яго абраў Божы Провід, а таксама прымаў віншаванні ад вернікаў, з якімі ён духоўна ўзрастаў на працягу многіх гадоў сваёй прысутнасці ў Царкве.